அக - புற - முகம் (2.5D)

உச்சி ஏறிக் கொண்டிருந்தான் - சூரியன்
உப்புக் காற்று வேண்டுமென்றது - நுரையீரல்
தண்ணீரில் நனையும் ஆசை வந்தது - கால்களுக்கு
உடனே ஏறினேன் தண்டவாள வண்டியில் . . .

இழவு வீட்டின் இரண்டாம் நாள் சூழல் - பெட்டியில்

என்னோடு சேர்ந்து மொத்தம் மூன்று பேர் .

கதர் ஆடையில், கடந்து செல்லும் இடங்களை,
கண் இமைக்காமல் பார்த்துக் கொண்டே - ஒரு பெரியவர்

அரைக்கால் டவுசரும், உடல் அப்பிய பனியனுமாய்
தனியாய் பேசியபடி - ஒரு அல்ட்ரா மாடர்ன் யுவன்

அழுது கொண்டிருந்த காற்றாடியிடம், அமைதியாய்
துக்கம் விசாரித்துக் கொண்டு - நான்

மௌனமாய் கடந்தன நொடிகள் . . .

இறங்கும் இடம் வந்தது - இறங்கினேன்.
எனைத் தொடர்ந்து - அவர்களும்

மீண்டும்,
பதினைந்து நிமிட பஸ் பயணம்
பஸ்ஸில் அவர்களோடு - நான்

வெவ்வேறு இடங்களிலிருந்து தொடங்கிய மூவரின்
பயணம் இப்போது ஒன்றாய் . . .

எங்கே இறங்கப் போகிறார்கள் ? தெரிந்து கொள்ளும்
ஆர்வம் என்னிடம் . . .

ஒவ்வொரு நிறுத்ததிலும், இறங்குவார்களா ?
என்று பார்த்துக் கொண்டே வந்தேன்.

நான் இறங்கும் இடம் வந்தது . . .
இறங்கித் திரும்பிப் பார்த்தால்,
இருவரும் நின்று கொண்டிருந்தனர் .

எங்களின் முன்னால் பரந்து விரிந்திருந்தது - கடற்க்கரை

ஒருவரையொருவர் பார்த்துக் கொண்டோம் . . .

. . . . . .

வெவ்வேறு திசைகளில் நடக்க ஆரம்பித்தோம் . . .

சற்று தூரம் நடந்த பின் ஏனோ அவர்களைத்
திரும்பிப் பார்க்கத் தோன்றியது . . .

இருவரும் கடல் நோக்கி நடந்து கொண்டிருந்தனர் - அவரவர் பாதையில்

கண்களை மூடி காற்றை உள்ளிழுத்தபடி நடக்க ஆரம்பிதேன் . . .

வண்டிக் கடைகள் இழுத்துப் போர்த்தியபடி உறங்கிக் கொண்டிருக்க,
அதனடியில் ஒரு பெண் தனியாக முதுகு காட்டிக் கொண்டிருந்தாள் . . .

அவளைக் கடக்கும் போது . . . தப்புத்தப்பு . . .
அவள் . . . அல்ல . . . அவர்கள்

அவள் மடிகளுக்கிடையே முகம் புதைத்தபடி - அவன்
அவன் தலை கோதியபடி - அவள்

சிதறிய புத்தகங்கள் வெயிலில் காய்ந்து கொண்டிருந்தது . . .

மல வாடை வீசியது அவ்விடத்தில் . . .

கண், காது பொத்தி
அவ்விடத்தை விட்டு வேகமாய் விலகி நடந்தேன் . . .

விலகி - விழித்து
உற்று நோக்கினால் . . .
. . . . . . . . . . . . . .

அங்கிங்கெங்கிலும் மல வாடை . . . .

தூரத்தில் . . . அந்த அல்ட்ரா மாடர்ன் இளைஞன்
நிர்வாணமாய் ஓடிக் கொண்டிருந்தான் . . .

வெகு அருகில் . . . குமட்டல் சத்தம்
கதர் ஆடைப் பெரியவர் - வாந்தி எடுத்துக் கொண்டிருந்தார் . . .

பாவம் . . . ஒவ்வாமை . . .

திரும்பி நடந்தேன் . . . .

நடுரோட்டில் புணர்வதர்க்கு
நாம் ஒன்றும் நாய்கள் அல்ல . . .

நாளைய தினசரிகளில் விளம்பரப்படுத்த வேண்டும்,
மெரீனாவில் நாய்பிடிக்க ஆட்கள் தேவை என்று . . .

அகம் ... புறம் ... ரணம் (2.5D)

வெயிலை நலம் விசாரித்துக் கொண்டிருந்தன
என் வேர்வைத் துளிகள் ...

எரியும் தீயில்
எண்ணெய் ஊற்றிக் கொண்டிருந்தது
பிளாட்பார மின்விசிறி ...

இரயிலை எதிர்பார்த்து - சிலர்
கிழக்கு பார்த்துக் கொண்டிருந்தனர் ...

" அப்பப்பா ... என்ன வெயில் ?
மழை பேஞ்சா பரவால்ல ... " - கைக்குட்டையில்
முகம் துடைத்தபடி பேசிக்கொண்டிருந்தார் - பெரியவர்

. . . . . . . . .

மழை !?..

மனம் ஏங்கத் தொடங்கியது ...
அம்மாவுக்குமாய் சேர்த்து ...

. . . . . . . . .

காபி ஸ்டாலில் சொட்டிக்கொண்டிருந்த குடிநீர்
குழாயில் கை நனைத்து விளையாடிக்
கொண்டிருந்தது - குழந்தை

. . . . . . . . .

அம்மாவின் ஞாபகக் கசிவுகள் ,
என் உணர்வுகளோடு விளையாட ஆரம்பித்தன
அந்தக் குழந்தையைப் போல ...

வானலியில் வறுபடும் வெங்காயமாய் வெந்து
புழுங்க ஆரம்பித்தது - மனம்

. . . . . . . . .

தூரத்தில், வெயிலுக்கு குடை பிடித்தபடி
நடந்து வந்து கொண்டிருந்தார் - ஒரு பெண்

. . . . . . . . .

வெப்பம் குறைந்து, குளிர் காற்று வீச ஆரம்பித்தது ...

. . . . . . . . .

கை நனைத்து விளையாடிக்கொண்டிருந்த குழந்தை
ஓடிச் சென்று தாவியது - அந்த குடை பெண்ணிடம் ...

"ஏய் .. நில்லு .." - கத்தினார் குழந்தையோடு இருந்தவர்

. . . . . . . . .

வானம் கிழித்து மண்ணில் இறங்கியது மின்னல்
வலியில் கதறித் துடித்தது - வானம் ...
ஆரவாரம்மாய் ஆரம்பித்தது - மழை

. . . . . . . . .

குழந்தைக்குமாய் சேர்த்து குடை பிடித்தபடி
ஓடி வந்தார் - அப்பெண்

. . . . . . . . .

மழையில் குளித்தபடி வந்து கொண்டிருந்தது - இரயில்

. . . . . . . . .

குடைப் பெண்ணிடம் குழந்தையை வாங்கியவர்
" அப்படியே அம்மா போல இருக்கீங்களா ...
அதான் .." என்றார்

அப்பெண் குழந்தையின் தலை வருடியபடி விலக
குழந்தை கைநீட்டி அழ ஆரம்பித்தது ...

. . . . . . . . .

நான் - என் கண்ணீர் துளி மறைக்க
மழையில் நனைய ஆரம்பிதேன் ...

. . . . . . . . .

இரயில் நின்றது ,
குடைபெண் - பெண்களின் பெட்டியில் ஏறினார் ...

. . . . . . . . .

மழை முரட்டுத்தனமாய் பெய்யத் தொடங்கியது
உள்ளும் ... புறமும் ...

. . . . . . . . .

சாலைகளில் - வழியடைத்து
தேங்க ஆரம்பித்தது மழை வெள்ளம் ...

. . . . . . . . .

சற்று முன், மழை விரும்பிய அப்பெரியவர்
மழை வெறுத்து விலகி நின்றார் ...

. . . . . . . . .

திரும்பிப் பார்த்தேன் ,
இரயில் மேற்க்கோடிக் கொண்டிருந்ததது ...

. . . . . . . . .

. . . . . . . . .

நனைந்தபடி நடக்க ஆரம்பிதேன் - டெலிபோன் பூத் நோக்கி ..

. . . . . . . . .

பாக்கெட்டில் இருந்த ஒத்த பத்து ரூபாய் நோட்டை
தடவியபடி, டயல் செய்து காத்திருந்தேன் .......

. . . . . . . . அம்மாவிடம் தலை துவட்டிக் கொள்ள . . . . . . . .